Apat na Taon sa Isang Iglap
Sa loob ng apat na taon ng pag-aaral sa Mataas na Paaralang Ateneo, masasabi kong marami akong mga karansan na hinding-hindi ko malilimutan. Maraming mga kaklase at guro ang nagpabago o nagpalinaw sa aking mga pananaw. May ilang mga sugat na nagsilbing pagkakataon upang mas matuto pa at maging malakas.
Kaya ngayong magtatapos na kami sa Mataas na Paaralan, nais kong ipayo sa lahat ng mga Atenista na pahalagahan nila ang bawat segundo na igugugol nila dito. Naaalala ko pa noong unang araw ng unang taon ko. Sinabi sa amin ni Padre Hizon na sa Mataas na Paaralan magsisimula ang pinakamasayang taon ng aming mga buhay. Ngayong nasa ika-4 na taon na ako, masasabi kong sang-ayon ako sa sinabi ng punong-guro. Tunay ngang maraming masasayang karanasan sa mataas na paaralan. Sa silid-paaralan pa nga lamang ay ‘di na mapigilan ang halakhakan ng bawat estudyante. Bukod sa kasiyahan, marami ring pagkakataong ako’y nadapa. May mga pagkakataon na kinailangan kong gawin ang ilang mga bagay kung saan ‘di talaga ako komportable. Isang halimbawa ay ang pag-arte ko noong ikatlong taon para sa proyekto naming “Dulaan.” Talagang likas sa pagatao ko ang pagiging mahiyain at ‘di ako sanay na umarte sa harap ng isang madla. Pero sa huli, nagawa ko rin ang pag-arte at kahit papaano, mas naging maayos ang pagpresenta ko sa aking sarili. Bukod sa pag-arte, marami pang ibang gawain tulad ng pagsayaw o pagkanta ang naranasan ko. At dahil sa mga gawaing ito, mas lumawak ang aking kaalaman sa bawat araw na lumipas.
Sa huli, nais ko lang ibahagi na sa kabila ng hirap at saya, maraming magagandang bunga ang pag-aaral sa Ateneo. Minsan pakiramdam ko’y walang katapusan ang pagdagsa ng mga problema. Kung minsan naman tila ako ang pinakamasaya na tao. Kaya anuman ang mararanasan ninyong nagsisimula pa lamang sa Mataas na Paaralan, tiyakin ninyo na susulitin ninyo ang bawat sandali kasama ang mga kaklase, kaibigan, pati na ang mga guro. Sa apat na taon na puno ng mga ‘di malilimutang pangyayari, hindi ninyo mamamalayan kung gaano kabilis ang buhay dito sa Mataas na Paaralang Ateneo de Manila.
No comments:
Post a Comment