Mataas na Paaralan. Apat na taong pag-aaral ng mga intermedyang aralin na kung tawagin ay mga araling paghahanda sa kolehiyo. Pagkatapos ng pitong taong pag-aaral ng simpleng aralin sa mababang paaralan, ito ang panahon na kailangang magseryoso dahil dito mahuhubog ang direksiyon na tatahakin ng bawat isa pagdating sa kolehiyo.
Ito ang pang-unawa at pagtingin ng marami sa atin sa Mataas na Paaralan noong tumuntong tayo sa unang taon. Sa pagdaan ng panahon, tayo ay sumunod sa mga patakaran at kahilingan ng Mataas na Paaralan. Nagsimula tayo na mababa pa ang perspektibo natin sa Mataas na Paaralan noon. Para tayong mga inosenteng mag-aaral na naninibago sa bagong sistema at mga patakaran. Ngayon, sa ating pagtatapos sa Mataas na Paaralan, naranasan natin na hindi pala ito mga simpleng apat na taon lamang na paghahabol at pagkakamit ng mga matataas na marka. Sa apat na taong ito, dito nagsimulang mabuo ang perspektibo natin sa buhay. Dito natin naranasan ang realidad kung paano paghirapan na makamit ang isang bagay at ang ginhawang dulot nito kapag nagawa ito. Dito natin nasimulang gamitin ang ating mga natutunan mula sa mga konsepto ng matematika at sa mga nobela ni Jose Rizal sa ating mga pang araw-araw na gawain at problema. Dito lumakas ang ating relasyon sa ating Panginoon at sa ating kapwa. Dito natin nasimulang makita ng malinaw ang mga mali sa pamamalakad sa ating bansa katulad ng korupsyon at katiwalian ng mga namamahala sa gobyerno. Dito natin nakita at nagamit ang ating husay at potensyal para sa ikabubuti ng ating mga sarili at pagtulong natin sa kapwa.
Kung tutuusin, napakaimportanteng seryosohin ang apat na taon sa Mataas na Paaralan dahil dito mabubuo at mahuhubog ang pananaw at direksiyon natin sa buhay. Ngayon Atenista, umahon at gumanda na ba ang perspektibo mo, o hanggang ngayon ba ay nagpapakabata ka pa rin?
No comments:
Post a Comment