Isang Sarkastikong Pagbabatid sa Aking Kapwa Atenista
Ang karaniwang panimula sa isang sulat na pagpapabatid sa mga mas batang Atenista ay “Sa aking kapwa-Atenista”. Isa itong kagalang-galang na panimula ngunit tingnan natin ang salitang “kapwa”. Kapwa nga lang ba kapag Atenista ka? Kapwa lang ba kapag naka asul kang polo, kapag maayos ang iyong gupit at buhok, at kung mabango ang simoy ng hangin tuwing dumadaan ka? Kapwa lang ba kung laging may laman ang iyong malalim na bulsa? Sana napaisip ka.
Sa katunayan, maari nating sabihin na maraming Atenista na hindi naman talaga Atenista. Marahil kasi ang tingin ng karaniwang ngunit hindi masasabing tunay na Atenista sa ibang tao ay hindi tao. Ang tunay na Atenista ay marunong makitungo sa kapwa, at binibigyan niya ng paninindigan ang kanyang pagigingmakatao at hindi lang nagbibigay ng malasakit para lang sa kanyang mga “kapwa-Atenista”. Ang rami ko nang nakitang mga Atenista na ang kakapal ng kanilang pagmumukha. Bakit? Kasi wala na silang ginawa kung hindi manghusga ng tao at ang kanilang pinagbabatayan ay napakababaw. Kasama na rito ang mga katangiang pisikal at sosyo-kultural, paraan ng pananamit, kutis ng mukha, kung siya’y mapayat o mataba, kung maitam man o maputi,mayaman,mabait, magaling sa math at kung magaling siya magbasketbol. Eto ang mga ehemplo kung ano ang pinagmumulan nang pagiging kapwa para sa karumal-dumal na mga Atenista. Ngayon na ako’y magtatapos rito sa mataas na paaralan ng Ateneo De Manila ang mga limag C’s, mga programa ng TD at CSIP at kung anu-ano pa ay mga suntok sa buwan para sa mga mag-aaral. Kumbaga, bato-bato sa langit, sana may matamaan. O sa mas medaling salita, pasok sa tenga, labas sa kanila. Sa aking pagkadisma, masasabi ko na may mga Atenista na magtatapos na walang natutunan.
Kaya kapwa-Atenista, atenista ka ba talaga? Siguro pag kinakanta na ang Alma Mater o pagnanalo tayo sa basketball ay nakataas ang iyong kamay. Pero pag ang tingin mo sa iyong katabi ay medyo kakaiba sa karaniwan, inaabot mo ba iyong mga kamay? “Man-for-others” raw diba? Mahaba pa ang iyong paglalakbay, kaibigan. Bigyan mo ng paninindigan ang iyong pagiging Atenista para ‘pag ika’y nakatapos na,matatawag ka ring tunay na Atenista.
No comments:
Post a Comment