“Ang Dapat Mabatid Ng Mga Atenista”
Mga guro, opisyal, aking mga kapwa Atenista, at mga minamahal naming mga magulang, aking kinalulugod na mabigyan ng pagkakataong maibahagi ang aking karanasan sa aking apat na taon na pananatili sa butihing Mataas na Paaralang ito.
Sa aking tinagal sa Mataas na Paaralan ng Ateneo de Manila, marahil aking nang naranasan ang halos lahat ng maaaring maranasan ng isang Atenista mula unang taon nito hanggang sa pagtatapos. Ngunit, akin lamang gustong ihandog ang ilan sa tingin kong pinakamahahalagang bagay na aking natutunan. Ang mga ito ay nais ko sanang mabatid ng aking mga kapwa Atenista, na sana, sa kanilang pagpatuloy paaralang ito ay kanila itong sariling matuklasan at isabuhay.
Hindi na ako magpapaliguy-ligoy pa. Una sa lahat, bilang Atenista, kailangan gampanan ang bawat responsibilidad na iniatas ng kahit na sino pa man – maaaring ang mismong nakatataas na opisyal ng paaaralang ito, ating mga guro, o kapwa mag-aaral lamang.
Hindi ako magmamalinis at itatanggi na mayroon akong mga responsibilidad na aking pinagsawalang-bahala. Subalit, dito ko natuklasan ang kahalagahan at kahulugan ng maatasan para sa proyekto. Sa bawat proyekto, marami ang nakasalalay – hindi lamang grado kundi pati na rin ang tiwala na ipinagsaalang-alang upang maging matagumpay ang mga pangarap mo sa buhay. Paminsan, hindi makakaila na tinitingnan natin ang responsibilidad base sa bigat nito. Dapat, sa bawat responsibilidad, pantay-pantay ang pagtingin dito, at ito ay dapat masagawa ng mahusay at hindi gawa ng napilitan lamang.
Ikalawa, upang gampanan ang pagiging tao. Napakasimpleng unawain, ngunit, napakahirap panindigan at pangatawanan. Maging tao sa pamamagitan ng pagbibigay ng respeto sa kahit na sinong tao at pag-unawa sa lahat ng pagkakataon dahil sa lahat ng pagkakataon, mabuti pa rin na magpakumbaba kaysa maging mapagmalaki sa sarili. Dahil dito, umuugnay na rin ang responsibilidad na gampanan ang pagbibigay pugay at utang na loob sa mga taong gumabay sa paglago ng kaisipan. Ang tanawin ang kabutihan ng iba ay ang tunay na susi sa pagtatagumpay ng isang Atenista dahil sa pagtanaw ng kanilang kabutihan. Iyong matutuklasan na sila ang naging tunay daan sa bawat tagumpay na iyong natamo.
Ngunit, ang pinakamahalaga sa lahat, ay ang gampanan ang pagiging anak ng Diyos. Ito ang masasabi kong pinakamahalaga sa lahat. Sapagka’t, kapag ito ay iyong natuklasan, iyo ring matutulkasan ang ganda at buti na naidulot ng Mataas na Paaralang ito at lahat ng bumubuo nito. Ang Diyos ang naghandog ng magandang regalo na tayo ay maging isa bilang isang komunidad.
Aking pinagpapasalamat ang pagbibigay oras niyo sa akin. Mabuhay kayo at pagpalain kayo ng Maykapal!
No comments:
Post a Comment